Isinulat ilang araw matapos ang Ondoy. (Setyembre, 2009)
———————————
BINGIT
Arleen C. Atienza
Humupa na’t natuyo ang burak
dala ng lagaslas ng luha ni Ina
ngunit ang panaghoy at pag-iimbot tungkol sa pag-asa’y
patuloy sa pagdaloy at pagbulwak.
Kasinlakas ng hangin ang paghampas ng panghihinayang
sa bawat nasadlak na tahanan.
Kasinlalim ng tubig ang iniwang sugat
dala ng mga inanod na alaala.
Sa likod ng makapal na ulap ng trahedya
ang pag-asa ng bagong simula,
sapagkat katatagan ang hatid
ng buhay na hindi inadyang mapatid.
